दमौली खबर संवाददाता
तनहुँ, चैत २६ गते
राष्ट्रिय स्वतन्त्र पार्टीका सभापति रवि लामिछाने राष्ट्रिय स्वतन्त्र पाटीलाई जनताको सबैभन्दा प्यारो पार्टी बनाउने बताउनु भएको छ । शनिबार तनहुँको आँबुखैरेनीमा गरिएको सभालाई सम्बोधन गर्दै लामिछानेले छोटो समयमा नै जनताले विश्वास गरेर मलजल गरेकोले तेस्रो ठुलो पार्टी बनाएको र आगामी चुनाव सम्ममा सबैभन्दा ठुुलो बनाउने बताउनुभयो ।
‘‘देश बदल्ने सपना पुरा गर्नको जनताको सबैभन्दा प्यारो पार्टी बनाउँछौं, लामिछानेले भन्नुभयो, हाल प्रतिनिधी सभामा १९ वटा बिरुवा छन् उपनिर्वाचनमा विरुवा थप हुन्छ’’। पुराना र वषौं देखि भोट हालेको पार्टी नेताले देश बदल्न नसकेकोले जनताको भरोसाको पार्टी रास्वपा भएको बताउनुभयो । उर्वर भूमी भएकाले अन्नको लागि अरु देशको भर नपर्नु पर्ने गरी पार्टीले योजना बनाएको उहाँले बताउनुभयो । भ्रमको खेती गरेर रास्वपाका उम्मेदवारलाई हिलो छाप्ने गरिएको लामिछानेले बताउनुभयो । जनताको माया, विश्वास र भरोसा बढेकाले उपनिर्वाचनका रास्वपाका उम्मेदवारले चुनाव जित्ने दाबी लामिछानेले बताउनुभयो । तनहुँ १ को उपनिर्वाचनको प्रतिनिधी सभा सदस्यका उम्मेदवार डा. स्वर्णिम वाग्लेले यदि आफूले यो चुनाव जिते तनहुँबासीले गर्व गर्न लायक काम गर्ने बताउनुभयो ।
चुनावी प्रतिस्पर्धामा उत्रिरहँदा आफू संस्कारयुक्त राजनिति गर्ने र कसैलाइ गाली गरेर होइन सम्मान गरेर सँगै प्रतिस्पर्धा गर्ने वाग्लेले बताउनुभयो । तनहुँ– १ मा वैशाख १० गते प्रतिनिधी सभा सदस्यमा उपनिर्वाचन हुँदैछ । प्रतिनिधी सभा सदस्य निर्वाचित रामचन्द्र पौडेल राष्ट्रपति बनेपछि तनहुँमा उपनिर्वाचन हुन लागेको हो । उपनिर्वाचनलाई केन्द्रीत गरी रास्वपाले चुनावी सभा गरेको थियो ।
