सञ्चार प्रविधि तथा सूचनामन्त्री एवम् नेपाल सरकारका प्रवक्ता पृथ्वीसुब्बा गुरुङले नेपाली भाषा, सस्कृति, सभ्यता लोप हुँदै गएका भन्दै चिन्ता व्यक्त गर्नु भएको छ । तनहुँको दमौलीमा शनिबारदेखि सुरु भएको तमु विद्यार्थी छोंज धींको बाह्रौँ राष्ट्रिय महाधिवेशनको उद्घाटन गर्दै मन्त्री गुरुङले आफ्नो पहिचान प्रति गर्व गर्न नसक्दा हराउँदै गएको बताउनुभयो ।
नेपाली धेरै जातजात, भाषाभाषी रहेको उल्लेख गर्दै मन्त्री गुरुङले ति जातिका आमाले मातृभाषा बोल्नु् पर्ने बताउनुभयो । आमाले बच्चासँग मातृभाषा बोलेनन् भने बच्चाले भाषा नजान्ने र भाषा नजान्नेले सभ्यता, भोषभुषा र सस्कृति प्रति पनि रुचि नराख्ने बताउनुभयो । मन्त्री गुरुङले भन्नुभयो, ‘हरेक आमाले आफ्नो मातृभाषामा कुरा बच्चालाई सिकाउनुहोस् आमाले नबोले बच्चाले सिक्न खोज्दैनन् । मातृभाषाको साथ साथै अङ्ग्रेजी भाषामा पनि दख्खल राख्नु पर्ने गुरुङले बताउनुभयो । अन्तराष्ट्रिय व्यापार, ज्ञान र खोजको लागि अङ्ग्रेजी सिक्नु पर्ने उहाँले बताउनुभयो ।
देशमा शिक्षा नीति परिवर्तन गरेर रोजगारी दिने शिक्षा प्रदान गर्न जरुरी रहेको मन्त्री गुरुङको भनाई थियो । धेरै युवाहरु रोजगारीको खोजिमा बिदेशिनु परेको प्रशङ्ग ल्याउँदै गुरुङ युवालाई स्वदेशमै रोजगारी र स्वरोजगार हुने शिक्षा दिनु पर्ने बताउनुभयो । हाल सूचना र सञ्चारको युग भएकोले सूचना र प्रविधि(आईसिटी), प्राविधिक शिक्षा प्रदान गरेर युवालाई स्वदेशमै भुलाउने वातावरण बनाउनु पर्ने गुरुङको भनाई थियो । समय सापेक्ष र विश्वको आवश्यकता अनुसार शिक्षा प्रदान गर्न सरकारले योजना बनाईरहेको गुरुङको भनाई थियो । मन्त्री गुरुङले युवाहरुलाई राजनीतिमा आउन आग्रह गर्नुभयो । विद्यार्थी सङ्गठनमा लागेका यु्वाहरुले सङ्गठनबाट राजनीतिको कखरा सिक्नु पर्ने र त्यसकै जगमा पार्टीमा आबद्ध भएर राजीतिक नेतृत्व लिनु पर्ने बताउनुभयो । मन्त्री गुरुङले भन्नुभयो, नगरपालिका, गाउँपालिकाको नेतृत्व, प्रदेश तथा सङ्घ सरकारको नेतृत्व लिनुपर्छ भन्ने सोचाई राखेर राजनीतिमा आघि बढ्न आवश्यक छ ।
कार्यक्रममा गण्डकी प्रदेशका आर्थिक मामिला मन्त्री डा.टकराज गुरुङ, जिल्ला समन्वय समिति तनहुँका प्रमुख शान्तिरमण वाग्ले लगायतले पर्यटकलाई आकर्षित गर्न सस्कृति, भाषा र भेषभुषाको संरक्षण गर्नुका साथै अतिथि सत्कारको लागि ज्ञान हासिल गरेर आर्यआर्जन गर्न सबैले ध्यान दिन जरुरी रहेको कुरामा जोड दिनु भएको थियो ।
तीन दिनसम्म सञ्चालन हुने महाधिवेशनको महाधिवेशनमा विभिन्न जिल्लाका पाँच सय प्रतिनिधिसहित एक हजार पाँच सय जनाको सहभागिता छ । महाधिवेशन उद्घाटन समारोह अगाडि दमौलीमा जातीय वेषभूषासहित सांस्कृतिक झाँकी निकालिएको थियो । महाधिवेशनले नयाँ नेतृत्व चयन गर्नेछ । तमु विद्यार्थी छोंज धीं गुरुङ विद्यार्थीको हकहित तथा अधिकार संरक्षण र संवर्द्धन गर्ने उद्देश्यले वि.सं २०५२ माघ २६ गते स्थापना भएको राष्ट्रिय महाधिवेशन मूल आयोजक समितिका संयोजक विश्वराज तमुले बताउनुभयो । तनहुँ जिल्लामा आउनको लागि सहज हुने भएकोले कार्यक्रम यहाँ गरिएको उहाँले जानकारी दिनुभयो ।
