प्रथम जननिर्वाचित प्रधानमन्त्री बिपी कोइरालाको ४३ औं स्मृति दिवसको अवसरमा विपी विचार समाज तनहुँको आयोजनामा मङ्गलबार दमौलीमा गरिएको एक दिवसीय विचार गोष्ठी भव्य रुपमा सम्पन्न भएको छ । ‘वर्तमान नेपालको राजनीतिक सन्दर्भ र वीपीको विचार विषयक एक दिवसीय विचार गोष्ठी आयोजना गरिएको हो ।
विपी विचार राष्ट्रिय समाजका केन्द्रीय सदस्य शुकुमलाल गुरुङको प्रमुख आथित्यतामा कार्यक्रममा सम्पन्न भएको थियो । सो अवसरमा गुरुङले विपीले दिएको मार्गदर्शन अनुसार नेपाली काँग्रेस नचलेकोले पार्टीमा विचलन आएको बताउनुभयो । तनहुँको राजनीतिकमा विपी विचार समाजमा आबद्ध सदस्यले निर्वाचनलाई प्रभावित बनाउन सक्ने शक्ति रहेको गुरुङले बताउनुभयो । ‘तनहुँको निर्णायक राजनीतिक शक्ति हामी नै हो’ गुरुङले दाबी गर्नु भयो ।
कार्यक्रममा समाजका केन्द्रीय सदस्य तथा तनहुँका सभापति हरिशरण पण्डितले नेपाली काँग्रेस १२ बुँदे दिल्ली सम्झौता देखि नै राजनीतिक दर्शनमा चुकेको बताउनुभयो । जनआन्दोलन २०६२÷०६३ को माग एकातिर र नेपालको संविधान २०७२ को लेखन अर्कोतिर रहेको उल्लेख गर्दै पण्डितले यो संविधान लेखनमा विदेशीको स्वार्थसिद्ध भएको र वास्तविक नेपाली जनताले हारेको बताउनुभयो । विपी एक राजनीतिज्ञ मात्र नभएर सिद्धान्तनिष्ठ, दार्शनिक भएको उल्लेख गर्दै वीपीलाई काँग्रेसले नै बुझ्न नसकेको बताउनुभयो ।
समाजका गण्डकी प्रदेशका पूर्व सचिव परशुराम गिरीले यो व्यवस्थाले भष्ट्राचार र भ्रष्ट्राचारीलाई प्रसय दिएको उल्लेख गर्दै वास्तविक नेपाली जनताले महंगो कर तिर्ने, र आफ्नो बालबच्चालाई बैदेशिक रोजगारीमा पठाएर जीवन धान्नु पर्ने परिस्थिती आएको बताउनुभयो । कार्यक्रममा समाजका उपसभापति क्या. रेशमबहादुर गुरुङ, सचिव पञ्चबहादुर गुरुङ, समाजका सदस्य इन्द्रप्रसाद पौडेल, प्रतापसिंह अधिकारी लगायतले विपीले प्रतिपादन गरेको सिद्धान्त अनुसार काँग्रेस नचलेकोले देश झनै गरीवि र अनिर्णयको बन्दी हुन पुगेको तथा जनताको अवस्थामा झनै नाजुक हुँदै गएकोकोले अहिले पनि विपी विचारको सान्दर्भीकता बढीरहेको उल्लेख गर्नुभयो । कार्यक्रममा समाजका सदस्य एवम् शुभेच्छुकहरुको बाक्लो उपस्थिति रहेको थियो ।
