दमौली खबर संवाददाता
अमरराज नहर्की
तनहुँ, माघ २१
कृषि बिकास बैंक लिमिटेड दमौली शाखा आफ्नै सुविधा सम्पन्न भवनबाट कार्य सञ्चालनमा ल्याएको छ । सम्पूर्ण बैंकिङग सेवा सुबिधा छिटो, छरितो, चुस्त र दुरुस्त रूपमा प्रदान गर्ने हेतुले आफ्नै भवनबाट शाखा सञ्चालनमा ल्याईएको बैंकले जनाएको छ ।
व्यास नगरपालिका–२ मेनरोड दमौलीमा रहेको दमौली शाखा अब बैंकको आफ्नै भवनमा सोही वडाको भिमसेनथान भवनमा स्थानान्तरण भएको छ । सुविधा सम्पन्न यस शाखाबाट ग्राहकहरुको वित्तीय आवश्यकता पूरा गर्न आवश्यक सम्पूर्ण बैंकिङ सेवा प्रदान गरिने बैंकले जनाएको छ । आफ्नै ६ रोपनी जमिनमा रहेको भवनलाई सजावट गराएर शुक्रबारबाट स्थानान्तरण गरिएको शाखा प्रबन्धक भोला शर्माले जानकारी दिनुभयो ।
आफ्नै भवनका सरेपछि मासिक एक लाख १० हजार रुपियाँ घर भाडा बचत भएको प्रबन्धक शर्माले जानकारी दिनुभयो । आफ्नै जमिनमा निर्मित भवनलाई ४५ लाख रुपियाँको लागतमा सजावटको कार्य गरेर सञ्चालनमा ल्याईएको उहाँले जानकारी दिनुभयो । ‘सुविधा सम्पन्न भवन भएकोले छिटो, छरितो, चुस्त र दुरुस्त रूपमा ग्राहकहरुलाई प्रदान गर्न सहज भएको छ’ प्रबन्धक शर्माले भन्नुभयो । ‘नयाँ भनवमा सरेपछि बैंकको आफ्नो जमिन र भवनको सुरक्षा हुनुका साथै भाडा तिर्नु नपर्दा रकम वचत भएको छ’ प्रबन्धक शर्माले भन्नुभयो ।
